Интихоботи парлумонии Тоҷикистонро 157 нозири Иттиҳоди давлатҳои мустақил назорат мекунанд. Дар ин бора хабаргузории “Ховар” бо такя ба Леонид Анфимов, муовини якуми Котиби генералии ИДМ, ки миссияи мушоҳидони ИДМ-ро дар интихоботи парлумонии Тоҷикистон роҳбарӣ мекунад, хабар додааст.

Ӯ таъкид кардааст, ин ҳайат аз 8-уми феврали соли 2025 “фаъолияти озоду шаффофи худро барои мониторинги омодагӣ ба интихобот ба роҳ мондааст”.

Ёдрас мешавем, ки нозирони Созмони амнияту ҳамкорӣ дар Аврупо (САҲА), ки қаблан интихобҳои Тоҷикистонро назорат мекарданд, имсол назорат намекунанд.

Ин созмон далели дасткашӣ аз назорати интихоботи парлумони дар 2-юми марти соли ҷориро “набудани кафолат аз ҷониби мақомоти Тоҷикистон дар бораи сабти ном ё аккредитатсияи нозирон”-аш унвон карда буд.

Дар ҳамин ҳол Сироҷиддин Муҳриддин, вазири корҳои хориҷии Тоҷикистон рӯзи 11-уми феврал дар нишасти матбуотӣ сабаби иҷозаи назорат ё худ парвона нагирифтани нозирони САҲА дар интихоботи порлумонии Тоҷикистонро шарҳ дода, гуфт, “онҳо аз пеши худ таърихи сабтином муайян карданд”.

Интихоботи парлумонии Тоҷикистон рӯзи 2-юми март баргузор мешавад.

Ба ғайр аз Ҳизби сосиал-демократи Тоҷикистон (ҲСДТ), ки дар гузашта яке аз ҳизбҳои мухолифи ҳукумати кишвар гуфта мешуд, 6 ҳизби дигари сиёсӣ номзадҳои худро барои интихобот пешниҳод кардаанд. Ҳоло давраи сабти ном ба охир расида, раванди таблиғи номзадҳо идома дорад.

Ҳоло аз 63 курсии вакилӣ дар парлумон аксарашро ҳизби ҳоким-Ҳизби халқии демократии Тоҷикистон (ҲХДТ) соҳиб аст. Ҳизби аграрӣ 7 ва Ҳизби ислоҳоти иқтисодӣ 5 вакил доранд. Ҳизби комунистӣ 2 вакил ва ҳизбҳои сотсиалистӣ 1 курсӣ доранд.

ҲСДТ, ки дар гузашта яке аз ҳизбҳои мухолиф шинохта мешуд, дар парлумон ҳеҷ гоҳ курсӣ надошт.

Ҳамаи ин ҳизбзҳо ошкору пинҳон аз ҳукумат ҷонибдорӣ мекунанд ва коршиносони мустақил мегӯянд, онҳо дар фазои сиёсии кишвар таъсири муассире гузошта наметавонанд.

Дар Telegram, Facebook ва Instagram бо мо бимонед.