Душанбе. 18-уми август. ОИ «Азия-Плюс» - Дар шаҳри Душанбе зимни боздиди расмии сарони кишварҳои Русия Д.Медведев ва Чин Ху Тсзинтао аз Тоҷикистон як қатор асноди дуҷонибаи ҳамкорӣ ба имзо хоҳанд расид. Сардори департаменти иттилооти Вазорати умури хориҷии Тоҷикистон Давлат Назриев ба мухбири ОИ «Азия-Плюс» хабар дод, ки айни замон рӯйи мувофиқасозии асноди мазкур корҳо идома доранд. Ӯ қайд кард, ки боздиди расмии сарвари Чин ба 27-уми август ва Русия ба 29-уми август муқаррар шудааст.

Намояндаи вазорати умури хориҷии кишвар изҳор дошт, ки дар боздидҳои расмӣ мулоқоти «танҳо ба танҳо»-и сарони кишварҳо ва дидори васеи ҳайати ҷонибҳо баргузор мешавад. Д.Медведев ва Ху Тсзинтао ҳамчунин бо сарвазири Тоҷикистон Оқил Оқилов низ дидору гуфтугӯ хоҳанд кард. Боздиди Д.Медведев аз пойгоҳи ҳарбии 201-уми Русия дар Тоҷикистон низ пешбинӣ гардидааст.