Душанбе. 14-уми феврал. ОИ «Азия-Плюс» - Субҳи имрӯз тайёра бо ҳайати Тоҷикистон таҳти сарварии президенти ҷумҳурӣ ба майдони ҳавоии Душанбе фуруд омад. Дар доираи сафар ба Аврупо президенти Тоҷикистон аз кишварҳои Латвия, Белгия, Литва ва Эстония боздид кард.

Дар сафар президентро вазири умури хориҷӣ Ҳмарохона Зарифӣ, мушовири давлатии президент оид ба сиёсати хориҷӣ Эркин Раҳматуллоев, раиси Кумитаи давлатии сармоягузорӣ ва идораи амволи давлатӣ Фаррух Ҳамралиев, муовини аввали вазири энергетика ва саноати кишвар Пӯлод Муҳиддинов, дигар шахсони расмӣ ва гурӯҳи соҳибкорон ҳамроҳӣ намуданд.

Тавре аз хадамоти матбуоти сарвари давлат хабар доданд, нимаи дуюми рӯзи 13 феврал Президенти Ҷумҳурии Тоҷикистон Эмомалӣ Раҳмон баҳри анҷом додани сафари корӣ ба Ҷумҳурии Эстония рафт.

Масоили ҷорӣ ва дурнамои ҳамкории ду кишвар зимни мулоқотҳои Сарвари давлати Тоҷикистон Эмомалӣ Раҳмон бо Президенти Ҷумҳурии Эстония Томас Хендрик Илвес, Сарвазири ин кишвар Андрус Ансип ва Раиси Парлумон Энее Иргма мавриди баррасӣ қарор гирифт.

Густариши   робитаҳои иқтисодию тиҷоратӣ, нақлиётию коммуникатсионӣ, истихроҷ ва коркарди металлҳои ранга ва сангҳои қиматбаҳо, бунёди коргоҳҳои заргарӣ ва истеҳсоли ҷавоҳироту ороишот, объектҳои гуногуни туристӣ ва ғайра аз самтҳои пурманфиати ҳамкорӣ барои ду кишвар маънидод гардид.

Президенти Ҷумҳурии Тоҷикистон Эмомалӣ Раҳмон Президенти Ҷумҳурии Эстония Томас Хендрик Илвесро даъват намуд, ки Тоҷикистон ташриф биёрад.

Сарони ду давлат аз рӯйи натиҷаи мулоқотҳои дуҷониба як   Эъломия оид багустариши муносибатҳо   миёни Тоҷикистону Эстония ба имзо расонданд.

Самтҳои гуногуни ҳамкорӣ ва барқарор намудани робитаҳои мустақими миёни истеҳсолкунандагону тоҷирон дар ҷамъомади намояндагони доираҳои соҳибкории ду кишвар низ муҳокима карда шуд.