Душанбе. 16-уми март. ОИ «Азия-Плюс» - Рӯзи шанбеи ҳафтаи гузашта Раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев ҳайати Комиссияи доимии байнипалатавӣ оид ба ҳамкории   Шӯрои   Федератсияи Маҷлиси Федералии Федератсияи Россия бо Маҷлиси миллиро таҳти сарварии муовини раиси Комиссияи Шӯрои   Федератсияи Маҷлиси Федералии Федератсияи Россия оид ба регламент ва ташкили   фаъолияти парламентӣ, аъзои   Кумитаи Шӯрои Федератсия роҷеъ ба корҳои Иттиҳоди Давлатҳои Мустақил Олег Пантелеев ба ҳузур пазируфт.

Тавре ёвари раиси палатаи болоии парлумони ҷумҳурӣ Шавкат Саидов ба ОИ «Азия-Плюс» хабар дод, дар ҷараёни мулоқот Маҳмадсаид Убайдуллоев ташрифи парламентарҳоро оид ба баргузории ҷаласаи дуюми Комиссия, ки дар партави охирин   сафари Президенти мамлакат ба Федератсияи Россия ва нақшаи ҳамкориҳои парламентҳо анҷом мегирад, нек арзёбӣ намуда, таъкид сохт, ки потенсиали Комиссия дар матраҳсозии паҳлӯҳои амиқи рушди муносибатҳои байнипарламентӣ, ки тавассути фароҳам овардани фазои мусоиди ҳуқуқӣ ба инкишофи робитаҳои иҷтимоиву иқтисодии кишварҳо нақши муассир гузошта тавонад, равона карда шавад.

Дар ин зимн бо ироаи пешниҳодҳои мушаххас оид ба омодагиҳо ба Форуми чоруми байнипарламентии «Тоҷикистон-Русия: нерӯи ҳамкориҳои байниминтақавӣ», ки нимаи дуюми соли 2009 дар шаҳрҳои Маскав ва Санкт-Петербурги Федератсияи Русияя баргузор хоҳад гашт, ба фаъолияти Комиссия дар иҷрои вазифаҳои таъинотӣ муваффақият орзу намуд.