Душанбе. 29-уми июл. ОИ «Азия-Плюс» - Нимаи дуввуми имрӯз президенти Афғонистон Ҳомид Карзай бо сафари кории дурӯза вориди Тоҷикистон шуд.

            Чӣ тавре ки ба ОИ «Азия-Плюс» аз хадамоти матбуоти Вазорати умури хориҷии ҶТ иттилоъ доданд, пас аз ворид гардидан ба Тоҷикистон Ҳомид Карзай бо сарвари давлати Тоҷикистон гуфтушунид кардааст.

            Бино ба иттилои манбаъ, чанде баъдтар президенти Афғонистон дар маросими гузоштани хишти аввали таҳкурсии бинои сафоратхонаи Афғонистон дар Тоҷикистон, ки дар микрорайони 82-уми пойтахт бунёд мегардад, ширкат хоҳад варзид.

          Нимаи аввали рӯзи 30-юми июл вохӯрии сеҷонибаи сарони кишварҳои Тоҷикистон, Афғонистон ва Покистон доир гардида, дар нимаи дуввуми рӯз ба мулоқот президенти Русия низ ҳамроҳ хоҳад шуд.