Душанбе. 21-уми июл. «Азия-Плюс» — | Дар иҷлосияи имрӯзаи палатаи болоии парлумони ҷумҳурӣ даъвати чорум Қонуни ҶТ «Дар бораи масъулияти падару модар дар таълиму тарбияи фарзанд» баррасӣ мешавад.

Рӯзи 15-уми июн пас аз баҳсҳои тӯлониву тезутунд палатаи поёнии парлумони кишвар ин қонунро маъқул шуморид, ки миёни аҳли ҷомеаи Тоҷикистон ва дар сатҳи байнулмилалӣ вокунишҳои гуногунро ба бор овард.

Масалан, рӯзи 23-юми июни соли ҷорӣ дар ҷаласаи Шӯрои доимии Созмони амнияту ҳамкории Аврупо (САҲА) иҷрокунандаи вазифаи мушвоир оид ба масоили сиёсии намояндагии доимии ИМА дар назди САҲА Патрик Коннелл дар робита ба ин масъала изҳор кард, ки ИМА аз палатаи болоии парлумон ва президенти Тоҷикистон даъват ба амал меоварад, ки масъалаи имкони баргардонидани қонуни мазкур ба палатаи поёниро баррасӣ намоянд, то ки ба он тағйироти дахлдор, аз ҷумла бекор кардани муқаррарот дар бораи узвият ба ҷамъиятҳои динӣ ворид карда шавад.

Аммо, ба андешаи аксарияти мутлақи коршиносон, палатаи болоии парлумони ҷумҳурӣ бидуни баррасии густардаву доманадоре ин қонунро маъқул хоҳад шумурд.

Лоиҳаи Қонуни ҶТ «Дар бораи масъулияти падару модар дар таълиму тарбияи фарзанд» 14-уми декабри соли 2010 ба баррасии умумихалқӣ пешниҳод шуд. Ташаббускори таҳияву коркарди қонуни мазкур президенти Тоҷикистон аст.