Зимни ироаи паём ба парлумон президенти Тоҷикистон Эмомалӣ Раҳмон пешниҳод кард, ки ба ҳама гуна навъи санҷишу тафтишот ба фаъолияти истеҳсолкунандагони маҳсулоти ватанӣ ба муҳлати се сол моратория эълон карда шавад.

«Истеҳсолкунандагони ватаниро аз санҷишҳои беасосе, ки ба рушди истеҳсолот садд мегузоранд», озод кардан лозим аст», - гуфт вай.

Сарвари давлат ҳамчунин беҳбуд бахшидан ба кор дар бахши бонкдориро низ таъкид сохт. Ба гуфтаи ӯ, аввали солҳои 90-уми асри гузашта дар сохтори ВКД Раёсати мубориза бо ҷиноятҳои иқтисодӣ амал мекард, ки ба интиқоли маблағҳо ба ватан тавассути бонкҳо монеа эҷод мекард.

«Вақте ман шахсан дар бораи барҳам додани ин раёсат қарор қабул кардам, вазъ хеле беҳтар гардида, агар он замон ҳаҷми интиқоли маблағҳои пулӣ тавассути бонк ҳамагӣ ҳудуди 9 млн. $-ро ташкил медод, пас ҳозир он ба қариб 4 млрд. $ баробар шудааст», - гуфт президент.

Ҳамчунин Эмомалӣ Раҳмон зикр кард, ки вазифаи асосии давлат - ноил гардидан ба сатҳи баланди некӯаҳволии мардум ва таъмини рушди устувори иқтисодӣ аст. Дар робита ба ин сарвари давлат пешниҳод намуд, ки сатҳи музди меҳнати ҳадди ақалл 2,5 маротиба афзуда шавад. Айни замон ҳадди ақалли музди меҳнат дар кишвар 80 сомонӣ (ҳудуди 17 $) аст. Президенти Тоҷикистон ваъда кард, ки аз моҳи сентябр музди меҳнати ҳадди ақалл дар Тоҷикистон то 200 сомонӣ афзуда хоҳад шуд.

Дар мавриди масъалаи камбизоатии аҳолӣ президент изҳор кард, ки агар соли 1999 сатҳи камбизоатӣ дар Тоҷикистон 81%-ро ташкил медод, пас имрӯз ин нишондиҳанда то 42 % поин рафтааст. «Дар ин давра даромади аҳолӣ аз 1 млрд. то 16,2 млрд. сомонӣ зиёд шуд», - илова кард сарвари давлат.