Имрӯз раиси палатаи поёнии парлумони ҷумҳурӣ Шукурҷон Зуҳуров аз фаъолияти иҷлосияи сеюми Маҷлиси намояндагони Маҷлиси Олии ҶТ даъвати чорум натиҷагирӣ кард.

Зимни суханронӣ назди вакилон ӯ иброз дошт, ки аз моҳи октябри соли 2011 то моҳи июни соли 2012 27 ҷаласаи иҷлосияи сеюми маҷлиси намяондагон доир гардиданд, ки дар онҳо 140 қонунҳо қабул шуданд. Дар 39 ҷаласаҳои Шӯрои палатаи поёнии парлумони кишвар 571 масъала мавриди баррасӣ қарор гирифт.

Дар идома Шукурҷон Зуҳуров ибрози боварӣ намуд, ки қонун ва асноди меъёрӣ, созишномаҳо ва қарорҳои аз ҷониби парлумон қабулшуда ба рушди иқтисод, бахши иҷтимоии ҷумҳурӣ ва ҳамчунин таъмини ҳуқуқу озодиҳои шаҳрвандони Тоҷикистон мусоидат мекунанд.

Пас аз суханронии Шукурҷон Зуҳуров кори иҷлосияи сеюми Маҷлиси намояндагони Маҷлиси Олии ҶТ даъвати чорум пӯшида эълон гардида, вакилони палатаи поёнии парлумони кишвар ба таътили тобистона мебароянд.

Мутобиқи муқаррароти регламенти Маҷлиси намояндагон, рухсатиҳои меҳнатии вакилони мардумии палатаи поёнии парлумони ҷумҳурӣ аз 1-уми июл оғоз гардида, то нимаи моҳи август идома меёбанд. Сипас вакилони мардумӣ бо интихобкунандагони худ вохӯрда, ҳамчунин дар кумита ва комиссияҳои парлумон машғули кор хоҳанд шуд.

Дар назар аст, ки иҷлосияи 4-уми Маҷлиси намояндагони Маҷлиси Олии ҷумҳурӣ аввали моҳи октябр оғоз мегардад.