Бо фармони сарвари давлат Эмомалӣ Раҳмон Нуриддини Шамсов сафири нави Тоҷикистон дар Иёлоти Муттаҳидаи Амрико таъин карда шуд.

Бино ба маълумоти Вазорати корҳои хориҷии ҷумҳурӣ, қаблан Нуриддини Шамсов ба ҳайси сафири Тоҷикистон дар Австрия, намояндаи доимии Тоҷикистон дар Созмони амният ва ҳамкорӣ дар Аврупо ва созмонҳои дигари байналхалқӣ (Вена, Австрия) ифои вазифа мекард. То сари мансаб омадани Н.Шамсов намояндагии дипломатии Тоҷикистон дар ИМА-ро Абдуҷаббор Ширинов роҳбарӣ мекард.

Ҳамчунин бо фармони сарвари давлат сафири Тоҷикистон дар Ҷопон Ғуломҷон Бобозода ҳамзамон сафири Тоҷикистон дар Ҷумҳурии Корея таъин карда шуд.

Исматулло Насрединов намояндаи доимии Тоҷикистон дар Созмони амният ва ҳамкорӣ дар Аврупо ва созмонҳои дигари байналхалқӣ (Вена, Австрия) таъин гардид. То ин замон ӯ дар мансаби сардори Раёсат оид ба кишварҳои Аврупо ва Амрикои Вазорати корҳои хориҷӣ фаъолият дошт.