Ҳайати парлумонии Тоҷикистон таҳти сарварии раиси Маҷлиси намояндагони Маҷлиси Олии ҶТ Шукурҷон Зуҳуров дар ҷаласаҳои Асссамблеяи байнипарлумониии Иттиҳоди Давлатҳои Мустақил, Созмони аҳдномаи амнияти дасттаҷамъӣ ва Иттиҳоди иқтисодии Авруосиё (ЕврАзЭС), ки аз 21 то 24-уми ноябри соли ҷорӣ дар шаҳри Санкт-Петербург доир мегардад, иштирок мекунад.

Тавре ба ОИ «Азия-Плюс» котиби матбуотии палатаи поёнии парлумони ҷумҳурӣ Муҳаммадато Султонов иттилоъ дод, дар ҷаласаҳои зикршуда баррасии лоиҳаҳои қонунҳо дар бораи таҳкими ҳамгиройӣ ва ҳамкории кишварҳои паҳнои собиқи шӯравӣ дар назар аст.

«Ғайр аз ин, ҳайати парлумонии Тоҷикистон дар муколамаҳо оид ба истифодаи муштараки фазои кайҳонӣ бо мақсадҳои осоишта ва ҳамчунин чорабиниҳо ба ифтихори ёдбуди нависандаи маъруфи қирғиз Чингиз Айтматов низ ширкат хоҳад варзид», - гуфт номбурда.