Имрӯз таҳти раёсати раиси Маҷлиси намояндагони Маҷлиси Олии ҶТ Шукурҷон Зуҳуров ҷаласаи навбатии Шӯрои палатаи поёнии парлумони кишвар баргузор шуд.

Тавре ба ОИ «Азия-Плюс» аз хадамоти матбуоти МН МО ҶТ хабар доданд, дар ҷаласаи Шӯро дар бораи ворид намудани тағйироту илова ба қонун «Дар бораи рӯзҳои ид» қарор қабул шуд, ки он рӯзи чоршанбеи ҳафтаи равон (28-уми ноябр) дар ҷаласаи навбатии иҷлосияи чоруми палатаи поёнии парлумон баррасӣ хоҳад шуд.

Ба иттилои манбаъ, мутобиқи тағийроти пешниҳодшуда, минбаъд ҳамасола санаи 25-уми январ ҳамчун Рӯзи кормандони бахши ҳифзи иҷтимоии аҳолӣ таҷлил мегардад. Рӯзи истироҳат дар ин сана пешбинӣ нашудааст.

Зимнан зикр гардид, ки дар ҷаласаи Шӯрои парлумон ҳамчунин лоиҳаи қонун «Дар бораи савдо ва хизматрасонии маишӣ», тасҳеҳот ба Кодекси иҷрои ҷазои ҷиноятии ҶТ ва қонунҳо «Дар бораи боҷҳои давлатӣ», «Дар бораи нафақаҳои бимавӣ ва давлатӣ» ва «Дар бораи бақайдгирии давлатии шахсони ҳуқуқӣ ва соҳибкорони инфиродӣ» низ баррасӣ шуданд.