Имрӯз палатаи поёнии парлумони ҷумҳурӣ тағйироту илова ба Кодекси гумрукро, ки аз ҷониби сарвари давлат пешниҳод шуда буданд, якдилона маъқул шуморид.

Зимни шарҳи тағйирот ба вакилон муовини аввали Хадамоти гумруки назди ҳукумати ҶТ Неъмат Раҳмматов изҳор дошт, ки аз ин ба баъд ҳуҷҷатҳои расмиёти гумрукӣ ба молу маҳсулот дар кишвар аз 10 то 5 адад коҳиш меёбанд. «Коҳиши асноди расмиёти гумрукӣ бешубҳа ба рушди бозори Тоҷикистон мусоидат хоҳад намуд», - гуфт вай.

Раҳматов зикр кард, ки мутобиқи тағйирот шурӯъ аз 1-уми январи соли 2013 тамоми технологияи нави ба ҷумҳурӣ аз хориҷи кишвар воридшуда пурра аз пардохтҳои гумрукӣ озод карда мешаванд.

Ба қавли ӯ, тағйирот ба синнусоли ниҳоии ба нафақа баромадани кормандони мақомоти гумрук низ дахл дошт. «Акнун кормандони мақомоти гумрук зимни ба нафақа баромадан ба кормандони ВКД ва АНМН-и Тоҷикистон баробар шуда, муҳлати нафақаи кормандони гумруки рутбаи аз сержант то капитан – 50 сол, аз майор то полковник – 55 ва ҳайати генералҳо – 60 сол муқаррар гардид», - таъкид дошт Раҳматов.