Имрӯз дар ҷаласаи Шӯрои палатаи поёнии парлумони ҷумҳурӣ таҳти раёсати раиси МН МО ҶТ Шукурҷон Зуҳуров лоиҳаи қонун «Дар бораи пешгирии зӯроварӣ дар оила» мавриди баррасӣ қарор гирифт.

Бино ба маълумоти хадамоти матбуоти палатаи поёнии парлумони кишвар, зимни шарҳу тавзеҳи лоиҳаи қонуни мазкур раиси Кумита оид ба масъалаҳои иҷтимоӣ, оила ва тандурустии МН МО ҶТ Хайринисо Юсуфӣ зикр кард, ки қонуни мазкур бо назардошти ҷараёни амалисозии сиёсати давлатӣ дар бахши рафъи зуҳуроти зӯроварӣ дар оила таҳия шудааст.

Ба иттилои манбаъ, дар ҷаласаи Шӯрои парлумон ҳамчунин лоиҳаи қонуни ҶТ «Дар бораи матбуоти даврӣ ва дигар воситаҳои ахбори омма», масъалаҳои ворид намудани тағйироту илова бо қонунҳои ҶТ «Дар бораи Маҷлиси Олии ҶТ», «Дар бораи мақомоти ҳокимияти давлатӣ», «Дар бораи буҷети давлатии ҶТ барои соли 2012» ва дигар масоили рӯзмарра баррасӣ шуданд.

Тамоми масоили аз ҷониби Шӯро баррасишуда ба рӯзномаи ҷаласаи навбатии иҷлосияи чоруми Маҷлиси намояндагони Маҷлиси Олии ҶТ даъвати чорум, ки рӯзи 12-уми декабр баргузор мегардад, ворид шуданд.