Вакилони Маҷлиси намояндагони Маҷлиси олии ҶТ тағйироти аз ҷониби ҳукумат пешниҳодшуда ба қонунҳо «Дар бораи боҷҳои давлатӣ» ва «Дар бораи дигар пардохтҳои ҳатмӣ ба буҷет»-ро дастгирӣ намуданд.

Зимни ба вакилон шарҳ додани моҳияти тағийрот ба қонун раиси Кумитаи андози назди ҳукумати ҶТ Нусратулло Давлатов изҳор намуд, ки пас аз қабули он ҳаҷми чанде аз боҷҳои давлатӣ дар кишвар зиёд мешавад. «Дар тағйирот афзоиши ҳаҷми боҷи давлатӣ барои иҷозати вуруд ба кишвар ва хориҷ шудан аз он, боҷ барои додани раводиди Тоҷикистон, гирифтани ваколатнома барои идораи воситаи нақлиёт ва расмиёти нотариалии баъзе ҳуҷчатҳо пешбинӣ шудааст», - гуфт ӯ, вале мушаххасан аз то кадом андоза афзудани ҳаҷми онҳо сухан нагуфт ва вакилон ҳам аз ӯ дар ин хусус чизе напурсиданд.

Танҳо вакил Низом Қосим ба ҳаҷми боҷи иҷозати хориҷ шудан ва ба кишвар баргаштан таваҷҷуҳ зоҳир кард. «Боҷи иҷозати вуруд ба кишвар ва хориҷ шудан аз онро мо чор маротиба зиёд мекунем, ки метавонад барои афроди муваққатан аз кишвар хориҷшаванда монеъа эҷод созад», - гуфт ӯ.

Дар посух ба он раиси Кумитаи андоз зикр кард, ки айни замон ҳаҷми боҷи давлатӣ барои иҷозати вуруд ба кишвар ва хориҷ шудан аз он 40 сомонӣ ва пас аз қабули тағйирот 160 сомониро ташкил хоҳад дод, ки афзоиши начандон назаррас аст.

Мувофиқи тағйироти тасдиқшуда ба қонуни ҶТ «Дар бораи дигар пардохтҳои ҳатмӣ ба буҷет», минбаъд дар Тоҷикистон пардохти рекламаи беруна аз ҷониби паҳнкунандаи он сурат мегирад. Қаблан фармоишгарони ин рекламаҳоро низ ба чунин пардохт уҳдадор мекарданд.