Дар палати поёнии парлумони мамлакат таҳти раёсати муовини раиси МНМО ҶТ Мирганд Шабозов муҳокимаи ошкорои парлумонӣ баргузор шуда, дар он масъалаи таъмини молиявии татбиқи қарори ҳукумати ҶТ «Дар бораи тасдиқи Нақшаи стратегии оид ба солимии репродуктивии аҳолӣ дар давраи то соли 2014» баррасӣ шуд. Дар он намояндагону масъулони вазорату идораҳои дахлдор, аз ҷумла вазоратҳои тандурустӣ, молия, палатаи ҳисоб ва дигар ниҳодҳои марбута иштирок доштанд.

Бино ба иттилои хадамоти матбуоти МНМО ҶТ, зимни суханрониҳо дар робита ба ин масъала раиси Кумитаи МНМО ҶТ оид ба масъалаҳои иҷтимоӣ, оила ва ҳифзи саломатӣ Хайринисо Юсуфӣ, вазири тандурустӣ Нусратулло Салимов, раиси Палатаи ҳисоби Тоҷикистон Дилмурод Давлатов ва муовини вазири молияи ҷумҳурӣ Руҳулло Ҳакимов таъкид намуданд, ки нақшаи стратегии зикршудаи ҳукумати кишвар, қабл аз ҳама ба коҳиши сатҳи камбизоатӣ, танзими афзоиши шумори аҳолии ҷумҳурӣ ва ҳифзи солимии занону кӯдакон нигаронида шудааст.

«Маърӯзачиён зарурати ҷалби фаъолонаи намояндагони ҷомеаи шаҳрвандӣ ва ташкилотҳои мададрасони байнулмилалӣ дар амалисозии нақшаи стратегии мазкурро таъкид карданд», - иттилоъ медиҳад манбаъ.