Имрӯз аъзои Шӯрои Маҷлиси намояндагони Маҷлиси Олии Тоҷикистон дар ҷаласаи навбатии худ, ки таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров баргузор гардид, лоиҳаи қонун «Оид ба ворид намудани тагйиру иловаҳо ба Қонуни ҶТ «Дар бораи Буҷети давлатии Ҷумҳурии Тоҷикистон барои соли 2013»-ро баррасӣ карданд.

Бино ба иттилои сомонаи расмии палатаи поёнии парлумон, роҷеъ ба масъалаи мазкур раиси кумитаи Маҷлиси намояндагон оид ба иқтисод ва молия Сафаралӣ Раҷабов суханронӣ намуда, аз ҷумла изҳор дошт, ки дар таҳияи лоиҳаи Буҷети давлатӣ, пеш аз ҳама, афзалиятҳое, ки аз паёми президенти Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон ва вохӯриҳояш бо намояндагони аҳли ҷомеа бармеоянд, ба инобат гирифта шудаанд.

Ба иттилои манбаъ, дар ҷаласаи Шӯро ҳамчунин масоили ворид намудани тағйироту идова ба Қонунҳои ҶТ ««Дар бораи фаъолияти бонкӣ», «Дар бораи молияи давлатии Ҷумҳурии Тоҷикистон», «Дар бораи иҷозатномадиҳӣ ба баъзе намудҳои фаъолият», «Дар бораи монополияҳои табиӣ» ва Кодекси иҷрои ҷазои ҷиноятии Ҷумҳурии Тоҷикистон низ баррасӣ шуданд.

Аъзои Шӯрои Маҷлиси намояндагон аз рӯи ҳамаи масъалаҳои ба рӯзномаи ҷаласаи Шӯро воридшуда фикру андешаҳои худро ҷиҳати боз ҳам такмил ёфтани онҳо изҳор дошта, онҳо ҷиҳакти баррасии минбаъда ба кумита ва комиссяиҳои дахлдор парлумон ирсол гардиданд.