Чанде қабл раиси Маҷлиси миллии Маҷлиси Олии ҶТ Маҳмадсаид Убайдуллоев раиси Кумита оид ба корҳои ИДМ ва робита ба ҳамватанони Думаи Давлатии Русия Леонид Слутский ва мушовири раиси Думаи Давлатии Русия Михаилро Кротовро ба ҳузур пазируфт, ки ҷиҳати таҳияи барномаи сафари раиси Думаи давлатии Русия Сергей Наришкин ба Тоҷикистон дар нимаи аввали моҳи октябр дар Душанбе қарор доранд.

Тавре ба ОИ «Азия-Плюс» ёвари раиси палатаи болоии парлумони ҷумҳурӣ Шавкат Саидов хабар дод, М.Убайдуллоев ба сатҳи ҳамкориҳо миёни Тоҷикистону Русия дар бахшҳои сиёсату иқтисод, фарҳанг ва муносибатҳои байнипарлумонӣ баҳои баланд дода, изҳори итминон кард, ки сафари Сергей Наришкин ба Душанбе ба рушди ин ҳамкориҳо такони нав хоҳад бахшид.

«Ҷонибҳо ҳамчунин атрофи масоили таҳкими ҳамкориҳои дуҷониба дар соҳаҳои таъмини амнияти минтақавӣ, ҳимояти марзи давлатӣ, мубориза бо муомилоти ғайриқонунии маводи мухаддир, терроризм, танзими равнди муҳоҷирати меҳнатӣ, афзоиши шумори мактабҳои русзабон дар Тоҷикистон ва ташкили курсҳои омӯзиши забони русӣ табодули назар намуданд», - зикр кард Саидов.