Иҷрокунандаи вазифаи нахуствазири Тоҷикистон Оқил Оқилов дар ҷаласаи навбатии Шӯрои нахуствазирони кишварҳои узви Иттиҳоди Давлатҳои Мустақил, ки пагоҳ дар шаҳри Санкт-Петербург доир мегардад, ширкат хоҳад варзид.

Тавре ба ОИ «Азия-Плюс» сармушовири хадамоти матбуоти президенти ҶТ Субҳиддин Муҳиддинов хабар дод, рӯзномаи ҷаласаи Шӯрои нахуствазирони кишварҳои узви ИДМ беш аз 20 масъалаҳоро дар бар мегирад.

«Аз ҷумла дар ҷаласа лоиҳаи Нақшаи чорабиниҳои асосӣ оид ба омодагӣ ва таҷлили ҷашни 70-умиин солгарди Ғалаба дар ҶБВ, масъалаи тӯли солҳои 2014-2018 идома бахшидан ба ҷустуҷӯи хизматчиёни ҳарбии солҳои 1979-1989 дар ҷанги Афғонистон бедаракшуда, дарёфти макони гӯр шудани онҳо ва дубора дар ватан гӯронидани онҳо мавриди баррасӣ қарор мегиранд», - гуфт ӯ.

Ба қавли номбурда, аъзои Шӯрои нахуствазирон дар бораи муайян кардани мақоми ташкилотҳои заминавии ИДМ оид ба омӯзиши забони русӣ, такмили касбии кадрҳо дар бахши танзими зиддиинҳисорӣ ва сиёсати рақобатпазир, тайёр кардани кадрҳои низомӣ барои ҷузъу томҳои муҳандисии қувваҳои мусаллаҳи давлатҳои Иттиҳод низ қарорҳои дахлдор қабул хоҳанд кард.