Дар маҷлиси имрӯзаи ҳукумат таҳти раёсати президенти мамлакат Эмомалӣ Раҳмон дар сохтори ҳукумат як қатор тағйироти кадрӣ сурат гирифт.

Бино ба иттилои хадамоти матбуоти сарвари давлат, Бахтия Муҳаммадиева бо сабаби ба нафақа баромадан аз вазифаи Ддректори Агентии омори назди президенти Тоҷикистон озод карда шуда, ба ҷойи ӯ собиқ раиси Раёсати БДА «Амтнатбонк» Гулнора Ҳасанова ба ин мансаб таъин гардид. Собиқ муовини вазири молияи ҶТ Ҷамшед Норинов ба вазифаи Раиси раёсати БДА «Амонатбонк» таъин карда шуд.

Абдувалӣ Комилов аз вазифаи Директори Агентии сохтмон ва меъмории назди Ҳукумати Ҷумҳурии Тоҷикистон озод ва ба вазифаи Раиси Кумитаи меъморӣ ва сохтмони назди Ҳукумати Ҷумҳурии Тоҷикистон таъин карда шуд.

Ҳомидҷон Ҳасанов аз вазифаи Муовини вазири мелиоратсия ва захираҳои оби Ҷумҳурии Тоҷикистон озод карда шуда, Директори Агентии беҳдошти замин ва обёрии назди Ҳукумати Ҷумҳурии Тоҷикистон таъин гардид.

Ҳамчунин Раҳматулло Каримов аз вазифаи Муовини вазири мелиоратсия ва захираҳои оби Ҷумҳурии Тоҷикистон озод карда шуда, Ашӯралӣ Мирзоев Муовини сардори Хадамоти гумруки назди Ҳукумати Ҷумҳурии Тоҷикистон таъин гардид.

Мурод Ҷумъаев аз вазифаи Сардори Саридораи назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон озод шуда, Сардори Саридораи геологияи назди Ҳукумати Ҷумҳурии Тоҷикистон таъин гардид.

Ба вазифаи Сардори Саридораи назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон Сиҷовидин Мирзоев таъин карда шуд.

Азизулло Исматов аз вазифаи Директори Муассисаи давлатии хоҷагии ҷангал ва шикори Кумитаи ҳифзи муҳити зисти назди Ҳукумати Ҷумҳурии Тоҷикистон озод шуда, ба вазифаи Директори Агентии хоҷагии ҷангали назди Ҳукумати Ҷумҳурии Тоҷикистон таъин карда шуд.