Чанде қабл президенти ҷумҳурӣ Эмомалӣ Раҳмон дар бораи даъвати иҷлосияи якҷояи ғайринавбатии Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон даъвати чорум фармон ба имзо расонид.

Бино ба иттилои хадамоти матбуоти сарвари давлат, дар фармон зикр мегардад, ки иҷлосияи ғайринавбатии ҳарду палатаи парлумон рӯзи 16-уми декабри соли 2013 соати 9.00 дар шаҳри Душанбе даъват карда шавад.

Гуфта мешавад, ба баррасии иҷлосияи ғайринавбатии Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон даъвати чорум фармонҳои Президенти Ҷумҳурии Тоҷикистон дар бораи аз вазифа озод ва ба вазифа таъин намудани аъзои Ҳукумати Ҷумҳурии Тоҷикистон барои тасдиқ пешниҳод карда шаванд.