Дар ҷараёни сафари корӣ ба минтақаи Кӯлоб нахуствазири ҷумҳурӣ Қоҳир Расулзода аз бозори марказии «Саховат»-и шаҳри Кӯлоб, ки рӯзи 12-уми январ аз сӯхтор осеб дида буд, боздид кард.

Тавре ба ОИ «Азия-Плюс» сармушовири халамоти матуботи президенти Тоҷикистон Субҳиддин Муҳиддинов хабар дод, раиси шаҳри Кӯлоб Абдуғаффор Раҳмонов нахуствазирро бо рафти корҳои барқароркунӣ дар бозор шинос карда, таъкид дошт, ки бозор то таҷлили ҷашни Наврӯз пурра барқарор карда хоҳад шуд.

«Расулзода ба ҳукуматдорони маҳаллӣ дастур супориш дод, ки зимни барқарор кардани бозор ба ба масоили бехатарии зиддисӯхтор ва мутобиқати фурӯшгоҳҳо ба талаботи муосир ва санитарӣ таваҷҷуҳи ҷиддӣ зоҳир созанд», - гуфт ӯ.

Ёдрас мекунем, ки шаби 12 ба 13-уми январ дар бозори марказии «Саховат»-и шаҳри Кӯлоб сӯхтор сар зада , мағоза ва фурӯшгоҳҳои бахши савдои маҳсулоти саноатӣ ва мавриди ниёзи аввалияи мардум ба коми оташ рафтанд.

Тибқи арзёбии пешакии оташнишонон, сӯхтор майдони 3 ҳазор метри мураббаъро фаро гирифта, 96 мағоза ва 382 фурӯшгоҳ ба коми оташ рафтанд. Дар хомӯш кардани сӯхтор аз 14 адад техникаи махсус, 4 автомашинаи обпошак, 2 пойгоҳи обкашӣ ва даҳҳо адад техникаи дигар истифода шуд.