Чанде қабл нахуствазири ҷумҳурӣ Қоҳир Расулзода дар ноҳияи Ҳисор ҷаласаи саёри кумитаи тадорукоти омодагӣ ва баргузор намудани ҷашни 3000-солагии Ҳисорро баргузор намуд.

Сармушовири хадамоти матбуоти президенти ҶТ Субҳиддин Муҳиддинов ба ОИ «Азия-Плюс» дар ин робита иттилоъ дод, ки дар ҷаласа нахуствазир ҳисоботҳои шахсони масъул дар бораи кори иҷрошуда дар ин самтро шунид.

«Қоҳир Расулзода таваҷҷуҳи роҳбарони вазорату идораҳо ва раиси ноҳияро ба истифодаи мақсаднок ва саривақтии мабалғҳои пулии буҷет ва сифати кори иҷрошуда ҷалб кард», - гуфт Муҳиддинов.

Зимнан зикр гардид, ки дар ҷараёни сафар ба ноҳияи Ҳисор Қоҳир Расулзода ҳамчунин бевосита бо рафти корҳо дар иншооти ҷашнӣ аз наздик шинос шуд.