Имрӯз таҳти раёсати нахуствазири ҷумҳурӣ Қоҳир Расулзода оид ба ҷамъбасти натиҷаҳои рушди иқтисодию иҷтимоии ҷумҳурӣ дар семоҳаи аввали соли 2014 ва вазифаҳо барои нимсолаи аввали соли равон ҷаласаи васеи Раёсати ҳукумати Тоҷикистон баргузор шуд.

Тавре ба «Азия-Плюс» сармушовири хадамоти матбуоти президенти Тоҷикистон Субҳиддин Муҳиддинов хабар дод, зимни ҷаласа зикр гардид, ки дар семоҳаи аввали соли равон ҳаҷми Маҷмӯи маҳсулоти дохилии кишвар 7,8 млрд. сомониро ташкил дод, ки нисбат ба моҳҳои январ-марти соли гузашта 7% зиёдтар аст.

Ба иттилои манбаъ, нахуствазири ҷумҳурӣ аз ҷараёни афзун гардидани бақияи қарзи андоз, иҷро нагардидани қисмати хароҷоти буҷети давлатӣ, пардохт нагардидани музди маоши кормандон дар аксар ташкилоту идораҳои мамлакат, фаъолияти нокифояи корхонаҳои хурду бузурги саноатии мамлакат ва дигар камбудиҳои соҳаҳои иқтисодию  иҷтимоӣ изҳори нигаронӣ  карда, барои рафъи онҳо ба роҳбарони вазорату идораҳои дахлдори мамлакат дастуру супоришҳо дод.

Зимнан зикр гардид, ки Қоҳир Расулзода шахсони масъулро ба афзун намудани иқтидори содиротии мамлакат, ноил гардидан ба беҳбуди вазъ дар соҳаи саноати сабук ва дар маҷмӯъ бахши сармоягузорӣ вазифадор намуд.