Парлумони Ҷумҳурии Қирғизистон таъини Мирослав Ниёзов ба вазифаи сафири Қирғизистон дар Тоҷикистонро маъқул шуморид. Дар ин бора хабаргузории «24.kg» бо истинод ба хадамоти матбуоти парлумон иттилоъ медиҳад.

Ба иттилои манбаъ, дар Кумитаи Жогору Кенеши Қирғизистон оид ба умури байнулмилалӣ номзадии Ниёзов ба сифати сафири нави Қирғизистон дар Тоҷикистон мавриди баррасӣ қарор гирифтааст.

«Раиси Кумита Канибек Имоналиев таҷрибаи андӯхтаи дипломатии Мирослав Ниёзовро таъкид намуда, аз рӯи натиҷаи баррасиҳо ба таъини ӯ ба вазифаи сафири Қирғизиситон дар Тоҷикистон розигӣ дода шуд», - менависад хабаргузорӣ.

Мирослав Ниёзов соли 1951 таваллуд шуда, собиқ раиси Шӯрои амният ва қаблан низ намояндагии дипломатии Қирғизистон дар Тоҷикистонро роҳбарӣ кардааст.

Дар вазифаи сафири Қирғизистон дар Тоҷикистон ӯ Урмат Саралаевро, ки соли 1975 таваллуд шудааст, иваз мекунад. Санаи 20-уми октябри соли 2010 бо фармони президенти Қирғизистон Урмат Саралаев сафири Қирғизистон дар Тоҷикистон таъин шуда буд.