Раиси Ҳизби наҳзати исломии Тоҷикистон, вакили палатаи поёнии парлумон Муҳиддин Кабирӣ имрӯз раиси МНМО Тоҷикистон Шукурҷон Зуҳуровро аз ҳодисаи ҳамлаи чанде қабл ба худаш дар шаҳри Кӯлоб содиршуда пас аз вохӯрӣ бо ҷавонони маҳаллӣ огоҳ кард.

Имрӯз зимни ҷаласаи навбатии парлумон Шукурҷон Зуҳуров ба Муҳиддин Кабирӣ дар ин робита изҳор намуд, ки барои баррасии ин ҳодиса дар ҷаласа зарурате нест ва илова кард, ки «ин масъаларо бо вазири корҳои дохилии кишвар баррасӣ мекунад».

Ёдрас мекунем, ки рӯзи 10-уми июн баъд аз анҷоми вохӯрии раиси ҲНИТ дар шаҳри Кӯлоб бо ҷавонон болои раис ва ҳайати ҲНИТ  ҳамла сурат гирифт.

Ба андешаи Кабирӣ, «дарафтодагон» хоҳони амали ҷавобии бадрафторонаи намояндагони ҲНИТ буданд, вале сарфи назар аз иғвогариҳо, аъзои ҳизб посух ба онҳоро лоиқ надонистанд.

Усмон Солеҳ, мудири шӯъбаи таблиғот, иттилоот ва матбуоти ҲХДТ ба ОИ «Азия-Плюс» дар мавриди ин ҳодиса чунин ибрози андеша кард, ки «дар ҷомеаи демократие, ки мо имрӯз дар он зиндагӣ дорему меъёрҳои онро риоя мекунем, чунин муносибат ба як амали маъмулӣ табдил ёфтааст. «Ин ҳодисаи ба ин монанди аввалину охирин нест. Ин ҳам яке аз навъҳои изҳори норозигӣ буда, гувоҳи он аст, ки аҳолии ин минтақа аз фаъолияти ин ҳизб қаноатманд нест», - зикр кард номбурда.

Шоми дирӯз ба Шуъбаи ВКД Тоҷикистон дар шаҳри Кӯлоб дар бораи аз ҷониби афроди номаълум ба сӯйи раиси ҲНИТ Муҳиддин Кабирӣ партофта шудани помидору тухми мурғ ариза ворид гардид.