Ахири ҳафтаи сипаришуда нахуствазири ҷумҳурӣ Қоҳир Расулзода бо ҷараёни корҳои соҳилмустаҳкамкунӣ дар мавзеъҳои хавфноки наздисоҳилии дарёи Панҷ дар ноҳияи Мир Сайид Алии Ҳамадонии вилояти Хатлон шинос шуд.

Тавре ба «Азия-Плюс» сармушовири хадамоти матбуоти президенти ҶТ Субҳиддин Муҳиддинов хабар дод, нахуствазир бо корҳои соҳилмустаҳкамкунӣ дар мавзеъҳои Сарбанд ва Хилтони соҳили дарёи Панҷ ва мавзеи наздик ба канали Чубек, ки аз ҷониби ҳукумати кишвар маблағгузорӣ шудаанд, аз наздик ошно гардид.

«Дар мавзеъҳои зикршуда ва канали Чубек корҳои соҳилмустаҳкамкунӣ дар арафаи анҷомёбӣ қарор дошта, нахуствазир ба корхонаву ташкилотҳои дахлдор ҷиҳати захираи маводи сӯзишворӣ, масолеҳи сохтмон ва ҷалби техникаи иловагӣ баҳри суръат бахшидан ба корҳо дастуру супоришҳо дод», - гуфт манбаъ.