Имрӯз таҳти раёсати раиси палатаи поёнии парлумони ҷумҳурӣ Шукурҷон Зуҳуров ҷаласаи навбатии Маҷлиси намояндагони Маҷлиси Олии ҶТ доир гардида, дар он масъалаҳои ворид намудани тағйироту илова ба қонунҳо «Дар бораи моратория ба санҷиши фаъолияти субъектҳои соҳибкорӣ дар соҳаҳои истеҳсолот», «Дар бораи таъминоти нафақавии шаҳрвандони ҶТ» ва Кодекси ҷиноии Тоҷикистон баррасӣ шуданд.

Тавре котиби матбуотии палатаи поёнии парлумони кишвар Муҳамммадато Султонов хабар дод, бо қарори Шӯро масъалаҳои марбут ба тасдиқи Шартнома миёни Тоҷикистон ва Чин дар бораи истирдод, Созишнома миёни ҳукуматҳои Тоҷикистону Покистон дар бораи таъсиси гурӯҳи кории муштарак оид ба мубориза бо терроризми байнулмилалӣ ва Конвенсия дар бораи имтиёзот ва дахлнопазирӣ (иммунитет)-и муассисаҳои махсуси СММ ҷиҳати баррасӣ ба ҷаласаи наздики иҷлосияи шашуми Маҷлиси намояндагон даъвати чорум пешниҳод мешаванд.