Президенти Тоҷикистон Эмомалӣ Раҳмон ба сафирони кишвар дар давлатҳои арабӣ, аз ҷумла дар Арабистони Саудӣ, Қатар, Аморати Муттаҳидаи Араба, Кувайт ва Миср дастур додааст, ки барои аз қаламрави Ямани бо ҷангу хунрезӣ фарогирифташуда хориҷ кардани шаҳрвандони Тоҷикистон аз тамоми тадбирҳои дастрас кор гиранд.

Тавре ба «Азия-Плюс» як манбаъ аз ҳукумати ҷумҳурӣ хабар дод, сарвари давлат дар дастураш таъкид намудааст, ки дар иҷрои ин кор сафирон бо ҳукуматдорони расмии давлатҳои дӯст ҳамкорӣ кунанд.

Дар ҳамин ҳол, қаблан Вазорати корҳои хориҷии Тоҷикистон дар ин робита иттилоъ дода буд, ки барои аз қаламрави Яман  берун овардани шаҳрвандони худ Тоҷикистон ҳамаҷониба тадбир меандешад.

Роҳбари Раёсати иттилоот, матбуот, таҳлил ва тарҳрезии сиёсати хориҷии ВКХ Тоҷикистон Абдулфайз Атов ба «Азия-Плюс» дар ин робита изҳор намуд, ки айни замон ҷиҳати кӯчонидани шаҳрвандони Тоҷикистон аз шаҳрҳои Санъо ва Аден фарзияҳо ва роҳу воситаҳои гуногун мавриди омӯзишу таҳия қарор доранд.