Бо фармони президенти Тоҷикистон Эмомалӣ Раҳмон имрӯз, 9 апрел раисони шаҳрҳои Нораку Турсунзода ва ҳамчунин се ноҳияи кишвар аз вазифаҳояшон озод карда шуданд.

Бино ба иттилои хадамоти матбуоти сарвари давлат, бо қарори ҳукумат сардори Хадамоти назорати давлатии бехатарии корҳо дар саноат ва соҳаи кӯҳкории назди ҳукумати ҶТ Сиҷоиуддин Саломзода аз вазифааш озод гардида, иҷрокунандаи вазифаи раиси шаҳри Турсунзода таъин карда шуд ва дар ин мансаб Бобоалӣ Табарзодаро иваз намуд.

Бо фармони президент Миралӣ Раҷабзода аз мансаби раиси шаҳри Норак барканор гардида, иҷрокунандаи раиси Файзобод таъин гардид ва дар ин вазифа Имомназар Каримиёнро иваз кард. Фатҳулло Ҳурматов раиси нави шаҳри Норак таъин шуд.

Ҳамчунин бо фармони сарвари давлат Саидмурод Тағозода бинобар сабаби ба нафақа баромадан аз мансаби раиси ноҳияи Рӯдакӣ сабукдӯш гардида, ба ҷойи ӯ Муҳаммадраҳим Юсуфӣ раиси ин ноҳия таъин гардид.

Раиси ноҳияи Спитамен Маҷиди Муҳтадӣ низ бо фармони президент аз вазифааш озод карда шуда, Ориф Хоҷаев раиси ноҳияи мазкур таъин гардид.