Раиси Маҷлиси намояндагони Маҷлиси Олии Тоҷикистон Шукурҷон Зуҳуров  рӯзи 17 июн бо раиси вилояти Ҳамадонии Эрон Муҳаммад Носири Некбахт ва ҳамроҳони ӯ, ки бо мақсади шиносоӣ бо омодагиҳо ба ҷашни 700-солагии мутафаккири бузург Мирсайид Алии Ҳамадонӣ ба Тоҷикистон омадаанд мулоқот намуд.

Бино ба иттилои сомонаи расмии палатаи поёнии парлумони ҷумҳурӣ, зимни мулоқот масоили марбут ба густариши ҳарчи бештари ҳамкориҳои дуҷониба дар бахшҳои фарҳангу маориф ва иқтисоду энергетика мавриди баррсаӣ қарор гирифтанд.

Гуфта мешавад, дар ҷараёни вохӯрӣ ҳамчунин масъалаҳои таҳкими робитаҳои байнипарлумонӣ миёни кишварҳо матраҳ гардид.

Раиси палатаи поёнии парлумони Тоҷикистон пешниҳод намуд, ки Рӯзҳои фарҳанги вилояти Ҳамадонии Эрон дар Тоҷикистон ва Рӯзҳои фарҳанги минтақаҳои Тоҷикистон дар вилояти Ҳамадонии Эрон гузаронида шаванд.

Зимнан зикр мегардад, ки зимни дидору суҳбат ҷонибҳо атрофи масоили роҳандозии робитаҳои мустақим миёни соҳибкорони ҳарду кишвар ва ташкили ҳамоишҳои тиҷоратии минтақаҳои Тоҷикистону Эрон табодули назар намуданд.