Дар ҷаласаи Шӯрои Маҷлиси намояндагони Маҷлиси Олии ҶТ, ки имрӯз таҳти раёсати раиси палатаи поёнии парлумон Шукурҷон Зуҳуров доир гардид, масъалаи ба рӯзномаи ҷаласаи охирини иҷлосияи якуми МНМО ҶТ даъвати панҷум, ки нимаи аввали имрӯз доир мегардад, ворид намудани масъалаи тасдиқи Созишнома миёни ҳукумати Тоҷикистон ва ҳукумати ИМА оид ба андозбандиии кормандони маҳаллии сафорати ин кишвар дар Тоҷикистон баррасӣ шуд.

Котиби матбуотии палатаи поёнии парлумони кишвар Муҳаммадато Султонов ба «Азия-Плюс» дар ин робита иттилоъ дод, ки дар ҷаласаи Шӯрои парлумон ҳамчунин масъалаҳои марбут ба ворид намудани тағйироту илова бо қонунҳо «Дар бораи мубориза бо ҷинояткории муташаккил», «Дар бораи молияи давлатӣ», «Дар бораи маориф», «Дар бораи хизмати давлатӣ» ва «Дар бораи намунаҳои саноатӣ» низ мавриди баррасӣ қарор гирифтанд.

«Тағйироту илова ба қонунҳои дар боло зикршударо вакилони парлумон пас аз рухсатии тобистона, ки аз 1 июл то 30 сентябр идома меёбанд, мавриди омӯзишу таҳлил ва баррасӣ қарор хоҳанд дод», - гуфт М.Султонов.