Палатаи поёнии парлумон дар ҷаласаи имрӯзаи  худ тағйироту иловаи аз ҷониби ҳукумат пешниҳодшуда ба қонун «Дар бораи бақайдгирии давлатии асноди шаҳрвандӣ» ва ба Кодекси оиларо дастгирӣ намуд. Мутобиқи ин тағйирот ба қонунгузорӣ, дар ҷумҳурӣ никоҳ миёни хешу таборони наздик манъ карда мешавад.

Зимни суханронӣ доир ба ин масъала вазири тандурустӣ ва ҳифзи иҷтимоии аҳолӣ Нусратулло Салимзода изҳор дошт, ки аввали соли 2015 дар ҷумҳурӣ беш аз 30 ҳазор кӯдакони маъюб ба қайд гирифта шудаанд, ки аксари онҳо дар оилаҳои ҳамсарони хешу таборони наздик ба дунё омадаанд. «Минбаъд издивоҷ байни кӯдакони бародарон, кӯдакони хоҳарон, кӯдакони амаку тағо ва холаву аммаҳо манъ карда мешавад», - гуфт Салимзода.

Мутобиқи тағйироти қабулшуда, аз 1 июли соли 2016 пеш аз ақди никоҳ шаҳрвандон ҳатман аз муоинаи тиббии бепул мегузаранд. Минбаъд мақомоти САҲШ бидуни пешниҳоди чунин маълумотнома ба анҷом додани маросими ақди никоҳ ҳуқуқ нахоҳанд дошт.

Муҳоҷирони кории тоҷик, ки аз хориҷи кишвар бармегарданд, низ зимни бозгашт бояд ҳатман аз муоинаи тиббӣ гузаранд.