Дар ҷаласаи имрӯзаи Шӯрои Маҷлиси намояндагони маҷлиси Олии Тоҷикистон масъалаи тасдиқи шартнома миёни ҳукуматҳои Тоҷикистону Покистон дар бораи истирдод баррасӣ мешавад.

Котиби матбуотии палатаи поёнии парлумони ҷумҳурӣ Муҳаммадато Султонов ба «Азия-Плюс» иттилоъ дод, ки дар ҷаласаи Шӯро ҳамчунин Протокол оид ба ворид намудани тағйирот ба Созишнома миёни ҳукуматҳои Тоҷикистон ва Қазоқистон дар бораи фаъолияти корӣ ва ҳимояи ҳуқуқи муҳоҷирони корӣ - шаҳрвандони Тоҷикистон, ки муваққатан дар қаламрави Қазоқистон кор мекунанд ва фаъолияти корӣ ва ҳимояи ҳуқуқҳои муҳоҷирони корӣ - шаҳрвандони Қазоқистон, ки муваққатан дар қаламрави Тоҷикистон кор мекунанд, низ мавриди баррасӣ қарор мегирад. Ин созишнома 4 майи соли 2006 ба имзо расида буд.

Зимнан зикр гардид, ки ғайр аз ин, дар ҷаласаи мазкур масоили ворид намудани тағйироту иловаҳо ба қонунҳои кишвар «Дар бораи молияи давлатии Тоҷикистон», «Дар бораи низоми иҷозатномадиҳӣ», «Дар бораи тартиб ва шароитҳои дар ҳабс нигаҳдории гумонбаршудагон, айбдоршавандагон ва судшавандагон» низ баррасӣ мешаванд.