Дар Мақомоти иҷроияи ҳокимияти давлатии шаҳри Хуҷанд рӯзи 31 март бо иштироки фаъолон ҷаласа доир гардида, дар он и.в. раиси нави шаҳри Хуҷанд Шарифзода Шариф Файз муаррифӣ шуд.

Қобили зикр аст, ки санаи  30 март бо фармонҳои Президенти Тоҷикистон Эмомалӣ Раҳмон раиси шаҳри Хуҷанд Раҷаббой Аҳмадзода бо сабаби ба кори дигар гузаштанаш аз вазифааш озод гардида, ба ҷои ӯ Шарифзода Шариф Файз и.в раиси шаҳри Хуҷанд таъин гардид.

Бино ба иттилои дафтари матбуоти мақомоти шаҳрдории Хуҷанд, дар маҷлисгоҳи ҳукумати шаҳр бо иштироки раиси вилояти Суғд Абдураҳмон Қодирӣ ҷаласа баргузор гардида, зимни муаррифӣ А.Қодирӣ барои фаъолияти пурсамар ба собиқ шаҳрдори Хуҷанд Раҷаббой Аҳмадзода изҳори сипос намуд ва ба Шарифзода Шариф Файз дар иҷрои вазифаҳои хизматӣ барору комёбиҳо таманно намуд.

Гуфта мешавад, дар суҳбат бо фаъолон ва роҳбарияти шаҳр раиси вилоят барои вусъати корҳои бунёдкорӣ, омодагиҳо ба истиқболи 25-солагии Истиқлолияти давлатии Ҷумҳурии Тоҷикистон, иҷрои нақшаи андоз, беҳтар намудани сифати оби нӯшокӣ ва дигар масоили мубрам дастуру супоришҳо дод.

Шарифзода Шариф Файз зодаи шаҳри Хуҷанд буда, 29 апрели соли 1960 таваллуд шудааст. Соли 1977 ба Институти политехникии Тоҷикистон, факултаи сохтмони саноатӣ ва гражданӣ дохил шуда, соли 1982 онро бо ихтисоси муҳандис- сохтмончӣ хатм намудааст. Мавсуф дар вазифаҳои гуногун, аз ҷумла ҷонишини раиси шаҳри Хуҷанд (солҳои 1997-1999), раиси шаҳри Роғун (аз соли 2012 то 2016) фаъолият кардааст.