Нахуствазири Тоҷикистон Қоҳир Расулзода дар ҷаласаи Шӯрои нахуствазирони кишварҳои узви Иттиҳоди Давлатҳои мустақил, ки пагоҳ, 7 июн дар пойтахти Қирғизистон - шаҳри Бишкек доир мегардад, ширкат меварзад.

Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, дар пойтахти Қирғизистон Қоҳир Расулзода ба ҷуз иштирок дар кори ҷаласаи мазкур, ҳамчунин як қатор дидору гуфтушунидҳои дуҷониба низ анҷом медиҳад.

Бино ба маълумоти Кумитаи иҷроияи ИДМ, дар ҷаласаи Бишкек баррасии беш аз бист лоиҳаҳои аснод, ки ба тавсеъа ва густариши ҳамкориҳои кишварҳои Иттиҳод дар бахшҳои гуногун, асосан дар бахши иқтисод нигаронида шудаанд, дар назар аст.