Бо фармони президенти Тоҷикистон Эмомалӣ Раҳмон аз 30 июн Ҷумазода Шарифҷон раиси Ҳисор таъин карда шуд. То ин таъинот номбурда ба ҳайси раиси ноҳияи Ҳисор фаъолият намуда, дар робита ба Ҳисор додани мақоми шаҳр, ӯ раиси шаҳр таъин гардид.

Бино ба иттилои хадамоти матбуоти сарвари давлат, бо фармонҳои дигари президент бинобар сабаби ба кори дигар гузаштан, Шарипов Фаррух аз вазифаи сафири Тоҷикистон дар Туркия озод карда шуда, Раҷабиён Маҳмадалӣ Давлатшо ба ин вазифа таъин шуд. Собиров Маҳмудҷон бо сабаби ба нафақа баромаданаш аз вазифаи сафири Тоҷикистон дар Туркманистон озод карда шуд.

Бо қарорҳои ҳукумат, Рафиев Абдулваҳоб бо хоҳиши худаш аз вазифаи директори Корхонаи воҳиди давлатии ҷумҳуриявии «Пажӯҳишгоҳи лоиҳакашии «Нурофар» озод карда шуда, Абдулваҳобзода Рустам Назрулло ба ин вазифа таъин гардид.

Мамадҷонов Юнус аз вазифаи директори Институти геология, сохтмони ба заминҷунбӣ тобовар ва сейсмологияи Академияи илмҳои Тоҷикистон озод карда шуда, Оймуҳаммадзода Илҳомҷон Султон ба ин вазифа таъин гардид.