Мутобиқи тағйирот ба қонуни конститутсионӣ «Дар бораи судҳо», ки имрӯз аз ҷониби аъзои палатаи болоии парлумон маъқул дониста шуд, минбаъд судяҳои Тоҷикистон зимни таъиноти аввал ба ин вазифа, бояд ба комиссияи аз ҷониби Суди олӣ таъсисдодашуда имтиҳони тахассусӣ супоранд.

Ғайр аз ин, ба судяҳои ҷумҳурӣ синнусоли ба нафақа баромадан муқаррар шуд, ки барои судяҳои мард - 63 сол ва судяҳои зан - 58 солро ташкил медиҳад. Дар қонунгузории пешин чунин маҳдудиятҳо ҷой надоштанд.

«Ин иқдом ба ҳуқуқшиноснони ҷавону умедбахши кишвар роҳ боз мекунад», - гуфт зимни суханронӣ доир ба ин масъала узви Маҷлиси миллӣ Қаноатшо Лоиқзода.