Палатаи болоии парлумони Тоҷикистон имрӯз дар иҷлосияи навбатии худ бо пешниҳоди раиси палата Маҳмадсаид Убайдуллоев баррасии лоиҳаи тағйирот ба қонун «Дар бораи иҷораи молиявӣ - лизинг»-ро нахуст ба рӯзномаи иҷлосия ворид намуда, сипас баррасии онро ба таъхир гузошт.

Тағйирот асосан хусусияти саҳеҳкуниро дошта, аз ҷониби ҳукумат таҳия ва ҳанӯз 27 май аз ҷониби палатаи поёнии парлумон тасдиқ шуда буданд.

Зимни баррасии тағйироти мазкур М.Убайдуллоев дар матни он калима «сарқонун»-ро дарёфт, ки аз рӯи натиҷаҳои раъйпурсии умумихалқии санаи 22 май дар ҷумҳурӣ аз матни Конститутсияи ҶТ хориҷ шуда буд.

Раиси Маҷлиси миллӣ аз он изҳори норозигӣ кард, ки чӣ тавр чунин иштибоҳ то ба палатаи болоии парлумон омада расидааст, ки дар ин сатҳ иштибоҳ қобили қабул нест.