Президенти мамлакат, раиси Ҳизби халқии демократии Тоҷикистон Эмомалӣ Раҳмон ивази раиси Кумитаи иҷроияи ҳизбро дар вилояти Хатлон маъқул донист.

Тавре ба “Азия-Плюс” аз ҲХДТ хабар доданд, раиси нави Кумитаи иҷроияи ҲХДТ дар вилояти Хатлон вакили даъвати ҳозираи палатаи поёнии парлумони ҷумҳурӣ Қиёмиддин Миралиён интихоб шудааст. Ӯ 43-сола буда, омӯзгори фанни математика мебошад.

Собиқ раиси Кумитаи иҷроияи ҲХДТ дар вилояти Хатлон Абдулло Раҳмонзода бо сабаби ба мансаби раиси Кумитаи ҷавонон ва варзиши назди ҳукумати кишвар таъин шуданаш аз вазифа озод шудааст.

Ҳизби халқии демократии Тоҷикистон соли 1994 таъсис ёфта, роҳбари ҳизб раисҷумҳури Тоҷикистон Эмомалӣ Раҳмон аст. Айни замон шумори аъзои ҲХДТ беш аз 500 ҳазор нафарро ташкил медиҳад. Наздики 40%-и аъзои ҲХДТ ҷавонон мебошанд.

Аксари аъзои ҳукумат, вакилони ҳар ду палатаи парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзо ё номзадҳои аз ҷониби ҲХДТ пешбаришуда мебошанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.