Дар Душанбе рӯзи 25 январ иҷлосияи панҷуми Маҷлиси миллии Маҷлиси Олии Тоҷикистон (МММО ҶТ) даъвати шашум баргузор гардид, ки дар он прокурори генералии ҷумҳурӣ Юсуф Раҳмон дар бораи назорат аз болои риояи қонунҳо дар қаламрави ҷумҳурӣ дар соли 2020 ҳисобот дод.

Бино ба иттилои маркази матбуоти МММО ҶТ, раиси палатаи болоии парлумон Рустами Эмомалӣ назди мақомоти прокуратура доир ба пешгирии шомилшавии шаҳрвандони кишвар ба ҳизбу ҳаракатҳои экстремистию террористӣ, таъмини амнияти иттилоотии кишвар, коҳиш додани содиршавии ҷиноятҳои авбошӣ, бахусус авбошии гурӯҳӣ аз ҷониби наврасону ноболиғон бо истифода аз силоҳи сард вазифаҳои мушаххас гузошт.

Рустами Эмомалӣ таваҷҷуҳи прокурори генералиро ба афзоиши ҷиноятҳои коррупсионӣ, бартараф намудани ҳолатҳои сохтакорӣ ва изофанависии ҳисоботҳои оморӣ дар соҳаи кишоварзӣ ҷалб намуда, супориш дод, ки дар ин самт чораҳои иловагии қатъӣ андешида шавад.

Раиси Маҷлиси миллӣ аз мақомоти прокуратура тақозо намуд, ки дар мавриди ҳодисаҳои хариду фурӯши одамон ва гардиши ғайриқонунии маводи мухаддир тадбирҳои муассир андешида шавад.

Ӯ дастур дод, ки ба истифодаи шиканҷа нисбати боздоштшудагон ба гумони содир намудани ин ё он ҷиноят, инчунин маҳбусон дар зиндонҳои Тоҷикистон хотима бахшида шуда, дар сафҳои артиши Тоҷикистон аз муносибатҳои ғайриоинномавӣ пешгирӣ шавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.