Президенти Тоҷикистон Эмомалӣ Раҳмон ҷиҳати иштирок дар нишасти сеҷонибаи сарони кишварҳои Тоҷикистон, Туркманистон ва Ӯзбекистон, ки аввали моҳи августи соли равон  дар назар аст, ба Ашқобод меравад, хабар медиҳад Вазорати корҳои хориҷии ҷумҳурӣ.

Корҳои омодагӣ ба нишасти мазкур чанде пеш дар рафти конфронси видеоӣ бо иштироки вазирони хориҷии се кишвар: Сироҷиддин Муҳиддин (Тоҷикистон), Рашид Мередов (Туркманистон) ва Бахтиёр Саидов (Ӯзбекистон) баррасӣ шуданд.

Гуфта мешавад, вазирон лоиҳаи барнома, рӯзномаи ҷаласаи дарпешистода, инчунин лоиҳаи ҳуҷҷати ҷамъбастии нишастро баррасӣ карданд.

Сурат: mfa.tj

“Дар ин замина вазирон доир ба ҷанбаҳои афзалиятноки ҳамкориҳои минтақавӣ табодули афкор намуданд”, - зикр мешавад дар хабари Вазорат.

Дар нишасти мазкур баррасӣ ва табодули назар оид ба масоили муҳими ҳамкориҳо ва рушди минтақа, имкони таҳкими муносибатҳои сулҳомез ва субот дар қаламрави Осиёи Марказӣ ба нақша гирифта шудааст.

Дар Telegram, Facebook, Instagram, OK ва ВК бо мо бимонед.