Эмомалӣ Раҳмон, раисҷумҳури Тоҷикистон супориш додааст, ки сардори Раёсатии ВКД дар вилояти Хатлон, минтақаи Кӯлоб, шаҳри Бохтар ҳамроҳи муовинонашон, додситонии Хатлон бо муовинонаш, сардори гурӯҳи фаврии раёсати КДАМ дар Хатлон ва минтақаи Кӯлоб, роҳбари Оҷонсии зиддифасод дар вилояти Хатлон ҳамроҳи муовинонаш ва чанде аз сардорони раёсату шуъбаҳои дастгоҳи марказии ВКД, Додистонии кул, КДАМ, оҷонсиҳои зиддифасоду мубориза бо маводи мухаддир аз вазифа озод шаванд.
Ӯ ин супоришро дар ҷаласаи Шурои амнияти Ҷумҳурии Тоҷикистон имрӯз, 19-уми январ, додааст.
Хадамоти матбуотии президент менависад, ки дар ин ҷаласа, Эмомалӣ Раҳмон аз фаъолияти роҳбарони мақомоти қудратии вилоятӣ, минтақавӣ ва якчанд шаҳру ноҳияҳои вилояти Хатлон интиқод кард ва гуфт, онҳо дар иҷрои вазифаи хизматӣ ба бемасъулиятӣ роҳ додаанд.
“Сатҳи пасти касбӣ, ноуҳдабароӣ нисбат ба иҷрои вазифаҳои хизматӣ, роҳ додан ба ҳолатҳои коррупсионӣ, зиёд шудани ҷиноятҳои дорои хусусияти экстремистиву террористӣ, қочоқи маводи мухаддир, даст задани баъзе кормандони мақомоти ҳифзи ҳуқуқ, назоратӣ ва сохторҳои низомӣ ба қочоқи маводи нашъаовар ва молу маҳсулот, ба кор қабул намудани шахсони тасодуфӣ ва ғайрикасбӣ дар сафҳои мақомот, интихобу ҷобаҷогузории нодурусти кадрҳо аз ҷониби роҳбарони мақомот аз масъалаҳои муҳиме буданд, ки дар ҷаласаи Шурои амният мавриди муҳокимаи ҷиддӣ қарор гирифтанд”, - омадааст дар иттилоияи хадамоти матбуоти президент.
Дар робита ба ҳолатҳои зиёди қонунвайронкунӣ ва риоя нагардидани талаботи қонун ва оинномаҳои ҳарбӣ Эмомалӣ Раҳмон ба роҳбарони мақомоти ҳифзи ҳуқуқ супориш додааст:
- сардори Раёсати Вазорати корҳои дохилӣ дар вилояти Хатлон ва муовинони ӯ, сардори шуъбаи Вазорати корҳои дохилӣ дар шаҳри Кӯлоб, сардори шуъбаи Вазорати корҳои дохилӣ дар шаҳри Бохтар ва ноҳияи Кӯшониён, сардори Раёсати Вазорати корҳои дохилии вилояти Хатлон дар минтақаи Кӯлоб, сардорони баъзе раёсатҳои дастгоҳи марказии Вазорати корҳои дохилӣ;
- прокурори вилояти Хатлон ва муовинони ӯ, сардорони баъзе аз раёсатҳои Прокуратураи генералӣ ва прокуророни якчанд шаҳру ноҳияҳо;
- сардори гурӯҳи фаврии раёсати Кумитаи давлатии амнияти миллӣ дар вилояти Хатлон, сардори гурӯҳи фаврии ноҳияҳои минтақаи Кӯлоб ва сардорони якчанд раёсатҳои дастгоҳи марказии Кумитаи давлатии амнияти миллӣ;.
- сардори раёсати Агентии назорати давлатии молиявӣ ва мубориза бо коррупсия дар вилояти Хатлон ва муовинони ӯ, сардори шуъбаи Агентии назорати давлатии молиявӣ дар шаҳру ноҳияҳои минтақаи Кӯлоб ва сардори Раёсати назорати субъектҳои хоҷагидорӣ, лоиҳаҳои сармоягузории Агентӣ;
- сардорони якчанд раёсатҳои Агентии назорати маводи нашъаовар
аз вазифа озод карда шаванд.
Айни ҳол дар вилояти Хатлон сардори Раёсати ВКД Файзулло Низомзода, додситон Абдураҳим Раҳимзода, сардори Оҷонсии зиддифасод Карим Иброҳимзода мебошанд. Ҳоло маълум нест, ки ба ҷойи онҳо киҳо таъин мешаванд.
Инчунин, ба вазири мудофиа ва Фармондеҳи Қӯшунҳои сарҳадии Кумитаи давлатии амнияти миллии Тоҷикистон супориш дода шуд, ки командирони қисмҳои низомие, ки ба камбудиву қонунвайронкунӣ роҳ додаанд, аз вазифа озод карда, ҷиҳати бартараф намудани ҳама гуна ҳаракатҳои ғайриоинномавӣ тадбирҳои қатъӣ андешида, аз натиҷааш ба таври хаттӣ дар муддати 10 рӯз ҳисобот диҳанд.
Ба роҳбарони мақомоти ҳифзи ҳуқуқ, назоратӣ ва сохторҳои низомӣ супориш дода шуд, ки дар муддати даҳ рӯз масъалаи ҷобаҷогузории дурусти кадрҳо аз ҳисоби кормандони болаёқат, кордон, соҳибтаҷриба ва масъулиятшиносро таъмин намоянд.
“Мадина” чӣ гуна занони бешавҳарро ба ҷои кор таъмин мекунад?
КДАМ Тоҷикистон гуфт, чораҳои амниятиро дар сарҳади давлатӣ пурзӯр мекунад
Муҳлати ҳабси се узви оилаи Исломовҳо ва як шаҳрванди Қирғизистон низ тамдид гардид
Сангу чуб дар баробари танку туп. Эътирозгарон ба Толибон: посухи эътироз гулӯла нест!
Бонки осиёии рушд ба гумони ғолиб, дар маблағгузории сохтмони неругоҳи “Роғун” саҳм мегузорад
Имкони охирини муштзанҳои тоҷик барои дарёфти роҳхат ба Олимпиадаи Фаронса
“Се занро, аз ҷумла як ноболиғро ба никоҳаш даровардааст”. Боздошти як “қорӣ” бо гумони қаллобӣ
Миҷгона Маҳмадалиева аз Тоҷикистон дар ҳайати Кумитаи иҷроияи КФО. Бори нахуст дар Осиёи Марказӣ
Додгоҳи Маскав муҳлати ҳабси боз 4 гумонбари ҳамла ба “Крокус”-ро тамдид кард
Бар асари садама дар Ашт се нафар ба ҳалокат расиданд
Кулли ахбор
Авторизуйтесь, пожалуйста