Дирӯз, 11-уми март, Эмомалӣ Раҳмон, раиси ҷумҳури Тоҷикистон бо Абдулло Орипов, сарвазири Ӯзбекистон, ки барои иштирок дар нишасти навбатии Комиссияи муштараки байниҳукуматӣ доир ба ҳамкории иқтисодию тиҷоратӣ ба Душанбе омад, мулоқот кард.

Дафтари матбуоти раиси ҷумҳури Тоҷикистон хабар медиҳад, ки зимни вохӯрӣ маҷмуи масоили вобаста ба ҳолати кунунӣ ва дурнамои муносибатҳои дӯстӣ ва ҳамкорию шарокати ду кишвар, рӯзномаи ҷаласаи навбатии Комиссияи муштараки байниҳукуматӣ оид ба ҳамкории иқтисодию тиҷоратӣ, ки кори худро дар Душанбе оғоз мекунад, баррасӣ шуданд.

“Бо ишора ба афзоиши тиҷорати дуҷониба, ки ҳаҷми он дар соли гузашта ба зиёда аз 504 млн. доллари амрикоӣ расида буд, таъкид гардид, ки имкону захираҳо барои ба маротиб зиёд намудани ин нишондод мавҷуд аст. Дар ин зимн таваҷҷуҳи зиёд ба тавсеаи ҳамкорӣ дар соҳаҳои саноат, кишоварзӣ, энергетика, аз ҷумла тавлиди “нерӯи сабз” ва рушди “иқтисоди сабз” зоҳир гардид”, - зикр мекунад манбаъ.

Пештар Қоҳир Расулзода, сарвазири Тоҷикистон Абдулло Ориповро дар фурудгоҳ пешвоз гирифта, суҳбати кутоҳе анҷом дод, аммо мулоқоти расмии онҳо имрӯз, 12-уми март, дар Душанбе баргузор мешавад.

Дар назар аст, ки дар пайи им мулоқот санади дахлдор ба имзо расад.

Дар Telegram, Facebook ва Instagram бо мо бимонед.