Президенти Тоҷикистон Эмомалӣ Раҳмон дар робита ба садамаи ҳавопаймои мусофирбар дар Бразилия ба президенти ин кишвар Луис Инасиу Лула да Силва барқияи изҳори тасаллӣ ирсол намуд.

“Хабари суқути  ҳавопаймои мусофирбар дар вилояти Сан-Паулуи Ҷумҳурии Федеративии Бразилия, ки боиси талафоти зиёди ҷонӣ гардид, моро сахт андуҳгин намуд, - омадааст дар барқияи сарвари давлати Тоҷикистон.

- Дар робита ба ин фоҷеаи вазнин ба Шумо ва мардуми дӯсти Бразилия таъзияву таслияти амиқи инҷонибро иброз дошта, хоҳиш мекунам, ки ҳамдардии самимии моро ба пайвандону наздикони фавтидагон бирасонед”.

Ҳавопаймои ATR-72 (PS-VPB), ки аз Каскавела (иёлати Парана) ба фурудгоҳи байнулмилалии Гуарулюс (иёлати Сан-Паулу) парвоз анҷом медод, рӯзи 9 август ба садама дучор шуда, дар натиҷа ҳамаи 62 нафар мусофирон ва ҳайати сарнишинон ҳалок шуданд.

Дар ВКХ Бразилия хабар додаанд, ки ҳамаи ҳалокшудагон шаҳрвандони Бразилия ва яке аз онҳо шаҳрвандии Португалияро ҳам доштааст. Садама дар Винеду, тақрибан 70 километрии шимолу ғарби Сан-Пулу рух додааст. Ҳавопаймо дар мавзеи маҳаллаи аҳолинишин ба замин афтода, лекин касе аз сокинони ин мавзеъ осеб надидааст. Дар робита ба ин ҳодисаи фоҷеабор дар Бразилия мотами серӯза эълон шуд.

Дар Telegram, Facebook ва Instagram бо мо бимонед.