Миҷгона Бобоҷонзода, муовини Ваколатдори ҳуқуқи инсон (Омбудсмен), ки ҳамзамон Ваколатдори ҳуқуқи кӯдак дар Тоҷикистон буд, аз вазифа озод ва ба ҷои ӯ Нигора Муқимӣ ба ин мансаб таъин шудааст.

Пешниҳоди Эмомалӣ Раҳмон, раисҷумҳури Тоҷикистон ба додани ризоият барои ин тағйирот аз сӯи палатаи поёнии парлумони кишвар, имрӯз, 11-уми март қабул шудааст.

Сабаби барканории Миҷгона Бобоҷонзода ва ин ки ӯ мансаби дигаре гирифтааст, ё не, маълум нест. Ӯ аз соли 2021 дар ин вазифа кор мекард. Бобоҷонзода қабл аз расидан ба курсии омбудсмени кӯдак сармутахассиси Раёсати ҳуқуқи Дастгоҳи иҷроияи раисиҷумҳури Тоҷикистон фаъолият кардааст.

Нигора Муқимӣ қаблан дар вазифаи сардори раёсати муқовимат ба фасоди Оҷонсии мубориза бо фасоди кишвар кор мекард.

Ӯ хатмкардаи факултаи ҳуқуқшиносии Донишгоҳи миллии Тоҷикистон буда, тибқи иттилои расмӣ, фаъолияташро дар мақомоти Оҷонсии зиддифасод аз соли 2010 оғоз ва дар чанд раёсати муҳими ин ниҳод кор кардааст.

Ниҳоди Ваколатдор оид ба ҳуқуқи кудак, дар Тоҷикистон соли 2016 таъсис ёфт ва вазифаи он ҳифзи ҳуқуқу озодиҳои кудак мебошад. Роҳбари ин ниҳод як маротиба 5 сол таъин мешавад ва наметавонад ба ин вазифа бештар аз ду муҳлат пай дар пай таъин карда шавад. Аввалин роҳбари ин ниҳод Раҷабмо Ҳабибулозода буд, ки то соли 2021 дар ин мақом кор кард.

Дар Telegram, Facebook ва Instagram бо мо бимонед.