Душанбе. 20 апрел. «Азия-Плюс» - | Дар натиҷаи амалиёти вижаи боздошти ҷангҷӯёни боқимондаи узви гурӯҳи террористии Мулло Абдулло дар шарқи кишвар,  аз сӯйи мақомоти қудратӣ, таърихи 18 апрел, сокини ҷамоати Самсолиқи ноҳияи Нуробод, Мирхуҷа Шарипови 50 сола дастгир карда шуд. Дар ин бора  зимни нишасти матбуотӣ муовини вазири корҳои дохилаи Тоҷикистон Саидхон Ҷурахонов хабар дод.

«Ҳангоми боздошт Шарипов муқовимат нишон дода,сарбози горди миллии Тоҷикистон Сафаралӣ Ғаниеви 21 соларо кушт», - изҳор дошт муовини вазир.

Ба иттилои ВКД дар ҷойи ҳодиса автомат Калашников бо се тирдон кашф карда шуд. «Тибқи маълумоти дар даст дошта, феълан ду тан аз ҷангҷӯёни гурӯҳи Мулло Абдулло, ки тавонистанд аз макони задухурди рӯзи 15 апрел фирор кунанд, зинда ҳастанд. Амалиёти боздошти ин ду тан дар Рашт идома дорад»,- афзуд Ҷӯрахонов.