Конибодом. 14-уми июн. «Азия-Плюс» — | Дар ноҳияи Конибодом дар чаҳорчӯби барномаи Иттиҳоди Аврупо ва Барномаи рушди СММ оид ба мусоидат дар идораи марзҳо дар минтақаи Осиёи Марказӣ гузаргоҳи назоратии байнулмилалии «Патар» ба тавозуни Хадамоти гумруки назди ҳукумати ҷумҳурӣ супурда шуд.

Тавре ба ОИ «Азия-Плюс» аз мақомоти шаҳрдории Конибодом иттилоъ доданд, гузаргоҳ дар марзи Тоҷикистону Ӯзбекистон дар самти минтақаҳои воқеъ дар водии Фарғона ва ҳамчунин шаҳри Ӯши Қирғизистон ҷойгир шудааст.

Иншооти муосир бо таҷҳизоти назорати гумрукӣ, марзӣ, санитарӣ-эпидемиологӣ ва ҳамчунин бинои назорати дақиқи автомобилҳо, макони будубоши марзбонон, 2 гузаргоҳи назоратӣ ва пойгоҳи обкашӣ таъмин аст.

Биноҳо бо низоми гармкунӣ ва таъминот бо об, асбоб ва мебели корӣ, воситаҳои алоқа ва дастгоҳҳои назоратии ҷавобгӯ ба меъёрҳои байнулмилалӣ муҷаҳҳаз гардидааст.

Дар маросими ифтитоҳи гузаргоҳ намояндагони ҳукумати вилояти Суғд, хадамоти гумрук ва марзбонӣ, вазорати корҳои хориҷӣ, мақомоти ҳифзи ҳуқуқ, Иттиҳоди Аврупо, Барномаи рушди СММ ва аҳли ҷомеа ширкат варзиданд.