Душанбе. 24-уми июн. «Азия-Плюс» — | Сафари кории вазири мудофиаи Русия Анатолий Сердюков ба Тоҷикистон, ки рӯзҳои 24-25-уми июни соли ҷорӣ пешбинӣ гардида буд, ба вақти номуайян мавқуф гузошта шуд.

Тавре ба ОИ «Азия-Плюс» аз хадамоти матбуоти Вазорати мудофиаи ҷумҳурӣ иттилоъ доданд, шояд Антатолий Сердюков ҳафтаи оянда ба Душанбе ташриф орад. «Дар бораи санаи мушаххаси сафари вазири мудофиаи Русия ба Тоҷикистон ба таври иловагӣ хабар дода мешавад», - гуфтанд дар вазорат. Роҷеъ ба сабабҳои мавқуф гузошта шудани сафари корӣ маълумот дода намешавад.

Қобили зикр аст, ки дар чаҳорчӯби сафари Анатолий Сердюков ба Тоҷикистон гуфтушунидҳои ӯ бо президенти Тоҷикистон Эмомалӣ Раҳмон, вазири мудофиаи ҷумҳурӣ Шералӣ Хайруллоев ва ҳамчунин мақомоти раҳбарии пойгоҳи низомии муқими Душанбеи 201-уми Русия дар назар аст. Ҷонибҳо ният доранд, ки масоили таҳкими ҳамкориҳои дуҷонибаи низомиву техникиро мавриди баррасӣ қарор диҳанд.