Душанбе. 13-уми июл. «Азия-Плюс» — | Ба муносибати таҷлили ҷашни 20-умин солгарди истиқлоли ҷумҳурӣ бо иштироки беш аз 10 ҳазор афсарону сарбозони Қувваҳои Мусаллаҳи Тоҷикистон дар шаҳри Душанбе гузашти низомии пуршукӯҳ доир мегардад.

Тавре ба ОИ «Азия-Плюс» сардори маркази матбуоти Вазорати мудофиаи ҷумҳурӣ Фаридун Маҳмадалиев хабар дод, 80%-и иштирокчиёни гузашти низомиро намояндагони вазорати мазкур ташкил хоҳанд дод. «Ғайр аз ин, дар гузашти низомӣ воҳидҳои Гвардияи миллӣ, Сарраёсати нерӯҳои марзбонии КДАМ, Вазорати корҳои дохилӣ, Вазорати адлия ва ҷузъу томҳои Кумитаи ҳолатҳои фавқулодда ва мудофиаи граждании ҷумҳурӣ низ ширкат хоҳанд варзид», - гуфт ӯ.

Ба қавли вай, ба гузашти низомӣ сардори гарнизони Душанбе генерал-майор Латиф Файзиев фармондеҳӣ хоҳад кард. Гузаштро вазири мудофиаи кишвар Шералӣ Хайруллоев қабул хоҳад намуд. «Айни замон тамоми воҳидҳое, ки дар гузашт иштирок мекунанд, дар гирду атрофи шаҳр ба машқу тамрин машғуланд», - афзуд номбурда.

Зимнан зикр гардид, ки иштироки техникаи низомӣ дар гузашт дар назар нест.