Душанбе. 16-уми август. «Азия-Плюс» — | Ахири ҳафтаи гузашта зимни баргузории амалиёти махсус дар марзи Тоҷикистону Афғонистон кормандони шӯъбаи мубориза бо муомилоти ғайриқонунии маводи мухаддири РКД-и минтақаи Кӯлоби вилояти Хатлон 36 кило маводи мухаддирро мусодира намуданд.

Тавре ба ОИ «Азия-Плюс» аз Вазорати корҳои дохилии ҷумҳурӣ хабар доданд, дар деҳаи наздимарзии Сари Чашмаи ноҳияи Шӯрообод ба гумони даст доштан дар муомилоти ғайриқонунии маводи мухаддир шаҳрванди Афғонистон боздошт гардида, ҳангоми кофтукови шахсӣ аз ӯ ба миқдори 1 кило маводи нашъаовари ҳашиш ва 35 кило бангдона дарёфт ва мусодира карда шудааст.

«Аз рӯйи ин далел парвандаи ҷиноӣ боз шуда, корҳои тафтишотӣ буода мешаванд», - гуфтанд дар ВКД.

Бино ба маълумоти маркази матбуоти Вазорати корҳои дохилии ҷумҳурӣ, соли равон аз ҷониби кормандони тамоми воҳидҳои милисаи ҷумҳурӣ аз муомилоти ғайриқонунӣ ҳудуди 1,5 тонна маводи мухаддир мусодира карда шудааст.